بلاد الدهب

الموضوع ده كان فى دماغى من فتره وكنت حابه اكتب فيه كتير..واعتقد الوقت ده وقته.

الحكايه بدأت لما جه مهندس يونانى أسمه أدريان دنينوس وفكر فى بنا سد ضخم على نهر النيل يحفظ مياه الى بتضيع فى البحر ويكون ليها نفع كبير على مصر.

الفكره قعدت تلف لغايه لما وصلت لناصر..والى مش عارف او فاكر القصه يقدر يسمع أغنيه عبد الحليم.

السنه دى مصر بتحتفل بمرور 50 سنه على أخذ القرار ببنا السد العالى وجزء من فعاليات الاحتفال

ان معرض الكتب السنه دى حيكون حول السد العالى و روسيا هى ضيف الشرف.

يعنى من الواضح ان السنه دى حنسمع كلام كتير جدا عن السد العالى وأهميته ودوره ..الخ

لكن فى موضوع مرتبط بالسد حقيقه ،مهمش اعلاميا بشكل كبير وهو موضوع تهجير النوبيين، فى بعض الاحيان بيظهر الموضوع ده على السطح

و بسرعه يختفى من غير وجود تفاصيل كافيه

     النوبه 

للاسف الصوره المترسخه فى أذهن كتير من المصريين وغير المصريين للنوبيين صوره نمطيه مصدرها الافلام الابيض و أسود.

عم عبده البواب الرجل النوبى الاسمر صاحب الجلباب الواسع الذى يتكلم بلهجه غير مفهومه و مضحكه

أو عثمان عبدالباسط شخصيه الرجل النوبى الساذج التى اشتهر بهاعلى الكسار.

واخر شىء لهم ظهر فى الاعلام هى مشكله أغنيه هيفاء وهبى و القرد النوبى.

وقله من المصريين صادفهم الحظ بالتعامل مع شخصيات نوبيه خارج نطاق النمطيه،وأقل لها معرفه بتاريخ وثقافه النوبه أبعد من اغانى محمد منير ومنيب.

فبدايه أحب ان تقرأ عن النوبه أولا لتعرف ما هى ومن هم أهلها .

وجدير بالذكر ان الرئيس السادات ولد من أم نوبيه وان اللغه النوبيه كانت من اللغات المستخدمه فى الشفرات اثناء حرب 73

حق العوده؟

الكلمه بتبان كبيره و البعض بيعتبرها تضخيم اعلامى.بس لو اتحط كل شىء فى سياقه اعتقد مفهوم

بناء السد العالى ومانتج عنه من تحويل مجرى النيل وتكوين بحيره ناصر  غرقت بلاد النوبه بالكامل

وتهجير كافه ابنائها حوالى 18الف أسره .

بعد تهجيرهم 3 مرات قبل كده فى مرحله بناء وتعليه سد أسوان.

والكلام عن حقوق النوبيون وتعويضهم عن أراضيهم و منازلهم  ده مش كلام جديد.و الحوار فيه كان و مازال  بصوت عالى أحد التبوهات فى مصر.

ومع ظهور الكثير من ملفات الاقليات فى مصر و الاحتفالات بالسد وتخصيص اموال لبناء مدينه لاهالى النوبه وتحفظهم عليها
وكلام ايضا عن مناقشه الموضوع فى الامم المتحده

يظل الموضوع مجهول والتغطيه الاعلاميه ليه تعتبر معدومه

,احب أى حد نوبى او اى حد مطلع اكثر بالموضوع يدينا معلومات عن حقيقه الوضع

بدل ما مصر من اسكندريه للصعيد تايهه بين تصريحات وتعتيم الحكومه و تصريحات المقتضبه للبعض النوبيين فى الجرائد

ودورنا ان احنا نسلط الاهتمام بالموضوع ده و ماندفنش راسنا فى الطين ونقول كله تمام ياباشا .

ومنتعملش مع الموضوع باستخفاف او كأنه بيحصل فى بلد تانيه ..دول جزء من مصر

,انا فى راى ان ااقل واجب لتضحيه الناس دى علشان مصر كلها تشرب مايه و تزرع و يدخلها كهرباء انهم يتسمعوا بصوت واضح وعالى.

,اتمنى ان احتفاليه السد العالى تمتد وتبقى احتفاء بثقافه وتاريخ النوبه وفرصه اكبر ان مصر تعرف اكتر عن جزء مهم من ثقافتها و من تاريخها

ودى بعض لينكات الى اعتقد انها مثيره للاهتمام

http://alnobaa.com/vb/

http://nobanews.wordpress.com/

http://www.nobaa.com/bb/ 

http://www.facebook.com/group.php?gid=149859288576

http://en.wikipedia.org/wiki/Nubia